‘बलिदान’ अग्रस्थानमा, ‘हरिबहादुरको जुत्ता’ र ‘माइतीघर’ ले पनि कमाइमा निरन्तरता
धनगढी ,फूलपातीको अवसर पारेर असोज १३ गतेदेखि देशभर प्रदर्शनमा आएका तीन नेपाली चलचित्र — ‘बलिदान’, ‘माइतीघर’ र ‘हरिबहादुरको जुत्ता’ — का पछिल्ला बक्स अफिस कलेक्सन सार्वजनिक भएका छन्।
चलचित्र विकास बोर्डले सार्वजनिक गरेको तथ्याङ्क अनुसार, आठ दिनको प्रदर्शन अवधि (राति ११:५५ बजेसम्म) मा अभिनेता समिर भट्ट अभिनित ‘बलिदान’ ले सबैभन्दा धेरै कमाइ गरेको छ। चलचित्रले देशव्यापी रूपमा ३ करोड ७५ लाख ५३ हजार २ सय ५१ रुपैयाँ ग्रस कलेक्सन गर्दै अग्रस्थान कायम गरेको छ।
‘बलिदान’लाई नजिकबाट पछ्याइरहेको छ ‘हरिबहादुरको जुत्ता’। अभिनेता हरिवंश आचार्य मुख्य भूमिकामा रहेको यस चलचित्रले आठ दिनमा ३ करोड २१ लाख ७० हजार १ सय ६० रुपैयाँ कमाएको छ। यी दुई चलचित्रबीच करिब ५० लाख रुपैयाँको ग्रस अन्तर देखिएको छ।
त्यस्तै, अभिनेता केदार प्रसाद घिमिरे (माग्ने बुढा) अभिनित ‘माइतीघर’ ले आठ दिनमा २ करोड १३ लाख ६४ हजार ६ सय ९२ रुपैयाँ ग्रस कलेक्सन गरेको छ।
यद्यपि ‘बलिदान’ कमाइको हिसाबले अगाडि देखिए पनि, ठूलो बजेटमा बनेको चलचित्र भएकाले लगानी उठाउन चुनौतीपूर्ण देखिएको छ। करिब ६ करोड लागतमा बनेको भनिएको यस चलचित्रले लगानी सुरक्षित गर्न कम्तीमा १४ करोड ग्रस कलेक्सन गर्नुपर्ने बताइन्छ।
ग्रस कमाइको केवल आधा हिस्सा मात्रै निर्माताको भागमा पर्ने र त्यसबाट पनि कर तिर्नुपर्ने भएकाले, ओभरसिज र डिजिटल राइट्स बिक्रीबाट मात्र चलचित्रले सुरक्षित मोडमा पुग्न सक्ने अनुमान गरिएको छ। अन्यथा, उच्च हाइपका बाबजुद पनि ‘बलिदान’ लाई फ्लप ठहरिने जोखिम देखिएको छ।
अरू दुई चलचित्र—‘माइतीघर’ र ‘हरिबहादुरको जुत्ता’—ले भने तुलनात्मक रूपमा कम बजेटमा निर्माण भएकाले, हालको रफ्तारमा व्यापार कायम राखे लगानी सुरक्षित गर्न सक्ने अनुमान गरिएको छ।
