बलिउड अभिनेता फराज खानको ४६ बर्ष को उमेर मा निधन।
खबरचित्र सम्बादाता भारत।
बलिउड अभिनेता फराज खानको ४६ वर्षको उमेरमा निधन भएको छ । बुधबार अभिनेता खानको बेलगुरुको एक अस्पतालमा उपचारकै क्रममा निधन भएको हो ।
लामो समयदेखि बिरामी रहेका उनको निधन भएको अभिनेत्री पूजा भट्टले जानकारी दिएकी छन् । सामाजिक सञ्जाल ट्विटरमार्फत निधनको जानकारी दिँदै उनले दुःख समेत व्यक्त गरेकी छन् ।
‘भारी मनका साथ यो खबर भनिरहेकी छु कि फराजले हामी सबैलाई छाडेर गए, उनले छाडेको रिक्त ठाउँ कसैको उपस्थितिले पनि भरिँदैन’, उनले लेखेकी छन् । उनले मद्दतका लागि सबैलाई धन्यवाद दिँदै दुःखद् घडीमा परीवारलाई साथ दिन समेत आग्रह गरेकी छन् ।
फराज खान एक १९९० को दशकका चर्चित अभिनेता मानिन्थे । उनले ‘मेहन्दी’, ‘फरेब’, ‘दुल्हन बनू मैं तेरी’, र ‘चाँद बुझ गया’ जस्ता फिल्ममा काम काम गरेका थिए । खराब स्वास्थ्यका कारण उनी लामो समयदेखि फिल्मी क्षेत्रबाट टाढा रहँदै आएका थिए ।
उनको आर्थिक अवस्था पनि एकदमै कमजोर रहेको थियो । बेलगुरु अस्पतालमा भएको सबै खर्च बलिउडकै अर्का अभिनेता सलमान खानले तिरेर उनलाई सहयोग गरेका थिए । उनी अभिनेता युसफ खानका छोरा हुन् ।
