दशैंको माहोल र पारिवारिक कथासहित आउँदै ‘झिंगे दाउ २’
असोज २ गतेदेखि प्रदर्शनमा आउन लागेको नेपाली फिल्म ‘झिंगे दाउ २’ ले तीन नयाँ पोस्टर सार्वजनिक गर्दै औपचारिक रूपमा प्रचारप्रसार अभियान सुरु गरेको छ। निर्माण पक्षले पोस्टर सार्वजनिकसँगै अब गीत र ट्रेलर सार्वजनिक गर्दै प्रचारलाई थप तीव्र बनाउने जनाएको छ।
झिंगे दाउ २ का निर्देशक ज्ञानेन्द्र देउजा हुन्। फिल्ममा सुलभ प्रतिक, प्रतिक देउजा र समिक्षा देउजाको लगानी रहेको छ।
फिल्ममा विष्णु घिमिरे ‘कल्पित’को छायांकन, मित्र डी गुरुङको सम्पादन, अर्जुन पोखरेलको संगीत, रामजी लामिछानेको नृत्य निर्देशन तथा रोशन श्रेष्ठको एक्सन रहेको छ।
सार्वजनिक तीनवटै पोस्टरले फिल्मका फरक–फरक पक्षलाई प्रस्तुत गरेका छन्। पहिलो पोस्टरमा केकी अधिकारी र आँचल शर्मा हर्षित मुद्रामा देखिएका छन् भने हिउँवाला गौतम, महेश त्रिपाठी र कुशल बिष्ट भावुक अभिव्यक्तिमा प्रस्तुत भएका छन्।
दोस्रो पोस्टरमा दशैंको उमंग झल्किएको छ। मुख्य चार पात्रहरू पर्वको माहोलमा रमाइरहेको दृश्यले फिल्मको कथावस्तुमा दशैंलाई विशेष रूपमा समेटिएको संकेत गर्छ।
त्यस्तै, तेस्रो पोस्टरमा आर्यन सिग्देल समेत देखिएका छन्। मुख्य पात्रहरू अचम्मित मुद्रामा रहेका छन् भने आर्यनले उनीहरूलाई रोकेको जस्तो दृश्य प्रस्तुत गरिएको छ। निर्माण पक्षका अनुसार यी पोस्टरले दर्शकमाझ फिल्मप्रतिको उत्साह र चासो थप बढाउने विश्वास गरिएको छ।
फिल्ममा केकी अधिकारी, आँचल शर्मा, महेश त्रिपाठी, कुशल बिष्ट, आर्यन सिग्देल, हिउँवाला गौतम, सरोज खनाल, बसुन्धरा भुसाल, चैत्यदेवी सिंह, संगम भण्डारी, विजय देउजा, अंशु महर्जन, अयभराज बराल, उत्तम केसी, शिवहरि वैरागी नेपाल, आशा भुसाल, रेनु प्रधान र विनोद कुमार पौडेल लगायतका कलाकारहरूको अभिनय रहेको छ। साथै, मदनकृष्ण श्रेष्ठ र मिथिला शर्मा ले अतिथि कलाकारको रूपमा अभिनय गरेका छन्।
परिच्छेद सेन, गोविन्द फुयाल र शिशिर चालिसेको पटकथा तथा संवाद रहेको फिल्ममा विवेक बस्नेत र ईश्वर सिन्केमनाको छायांकन रहेको छ। चन्द्रबहादुर भण्डारी र गिरिराज घिमिरे मुख्य सहायक निर्देशकका रूपमा आबद्ध छन्।
कपनगढी सिनेमा प्रालि र फिल्म क्र्यू नेपाल प्रालिको प्रस्तुतिमा निर्माण भएको यो फिल्म तीन वर्षअघि सफल व्यापार गरेको ‘झिंगे दाउ’को सिक्वेल हो। पहिलो भागले बक्स अफिसमा राम्रो प्रतिक्रिया पाएकाले ‘झिंगे दाउ २’ प्रति पनि दर्शकको अपेक्षा उच्च रहेको छ।
